„Freepik“ nuotrauka

Sakuom, ka nedėdėlė garbie īr svetėmuom kalbuom rokoutėis, vuo dėdėlė sarmata savuosės gerā nemuokietė. Ta šimeta, artiejint Tarptautėnē gimtuosės kalbuos dėinā, katron pruovėjem vasarė 21-uo, jungamies pri Skouda rajuona savėvaldībės R. Granauskė vėišuosės bėbliuotėkas ėr Skouda žemaitiu draugėjės kvėitėma rašītė žemaitiu kalbuos dėktanta. Dėktanta rašīsem vasarė 6 dėina.

Dėktanta tėkslos – neožmėrštė žemaitiu kalbuos ėr muokītėis anuos gramatikas. Rašītė dėktanta gal vėsė solaukė 14-as metu, nepriklausuomā no anū gīvenamuosės vėitas.

Plungėškius rašītė dėktanta kvėitam i Plungės rajuona savėvaldībės vėišuojė bėbliuotėka-laikruodėnė (Parka g. 7) arba galėt rašītė veiziedamė tėisiuogėnė Skouda rajuona savėvaldībės R. Granauskė vėišuosės bėbliuotėkas transliacėjė „Facebook“ paskīruo. Al’ bet plungėškē rinkemuos Plungės vėišuojuo bėbliuotėkuo – krūvuo būs drōsiau ėr linksmiau rašītė!

Tus, katrėi dėktanta nuorėt rašītė bėbliuotėkuo, dėdėlē kvėitam lig vasarė 4 d. ožsėregistroutė elektruonėnio pašto genovaite.mateviciute@plungesvb.lt , nuors prijimsem rašītė ėr ožsėregistroutė nespiejosiūsius. Dėktanta pradė – 18.00 adīna.

Pasėbėngos dėktanta transliacėjē internetė, anon rašiosė̄jē ne bėbliuotėkuo par 30 mėnotu tories atsiūstė teksta „Word“ pormato arba nuskenouta, nupaveikslouta ronka rašīta varijanta elektruonėnio pašto dalia.zabitiene@svb.lt .
Dėktanta dalīviu gebiejėmā būs vertėnamė, atsėžvelgont i kalbėninka dr. Pabriežas Jūzapa veikalė „Žemaitiu kalba ėr rašība“ ėšdiestītas šiuos kalbuos gramatikas taisīklės.

Tarptautėnē gimtuosės kalbuos dėinā skėrtamė rėngėnie, katras tradicėškā būs vasarė 21 d. Skouda rajuona savėvaldībės Romoalda Granauskė vėišuojie bėbliuotėkuo (laika nuruodīsem vieliau), trīs, katrėi padėrbs ožvės mažiau klaidū, būs apduovėnuotė prizās ėr padiekuos raštās.

Kuožna meta dėktanta raša žemaitē ne tik ėš Žemaitėjės, bet ėr ėš kėtū Lietovuos regijuonu, net ožsėinė. Pasėtaika ėr vėins kėts sava gebiejėmus žemaitiu kalbuos rašībuo benuorīs ėšmiegintė aukštaitis. Ta laukam kou dėdesnė dėktanta dalīviu būrė.

Plungės rajuona savėvaldībės vėišuosės bėbliuotėkas inpormacėjė